Juvel II í Randers

Missiónsskipið Juvel II var á vitjan í Randers á páskum og nakrar dagar aftaná, mannað við yngri og eldri luttakarum. Ein áhugaverd og lívgandi vitjan fyri fólkið har á leiðini og okkum, sum komu framvið og steðgaðu tveir dagar. Har vóru mong, sum komu umborð og onnur, sum komu á møti í hølunum í Dytmærsken 9 – rættiliga tætt við skipið. Har varð evangeliserað úti á gongugøtuni og Orð Guds borið fram í sangi, vitnisburði og boðskapi. Túrar við bátunum vóru skipaðir við góðari luttøku av vitjandi fólki. Ein frægd at síggja ungu fólkini, sum íðin tóku lut í tí, sum fór fram.
Tey fóru heimaftur í dag, og bøn okkara skal vera, at tað, ið sáað hevur verið í Randers í hesum døgum, ríkliga skal bera ávøkst í hjarta og lívi teirra, sum hoyrdu orðið um Jesus.
Her eru nakrar myndir frá forvitnisligu vitjanini í Randers.